ЦÆХДЖЫНТÆ НÆ ХÆРЫН

Исты хæринагæн йæ хуыздæртæ, йæ дзаджджындæртæ нæ хæрын.

«Дзырд цæхджын у дзаджджыны синоним, æммидис дзырд. «Йæ цæхджынтæ йын нæ хæрын» дзырдтой цыдæр хæринæгтæй, йæ арæзтмæ гæсгæ ирон джынты хуызæн чи уыд (картофджын, цæхæраджын...). Кæд цæхджын дæр цæхæраджыны хуызæн хæринаг уыд; уæд æй хъуамæ исчи федтаид, æмæ зонид, фæлæ ахæм хабарыл никуы фембæлдтæн» фыссы Нафи. Дарддæр зæгъы, йæхæдæг кæй федта ахæм цæххджынтæ цæххссадæй конд. (Рæстдзинад, 2001, 160.) Ардæм ма бафтауын хъæуы уый, æмæ чындздзон чызджытæн фыссæн æхсæвмæ цы цæхджын гуылтæ кодтой, уыдон дæр хуыдтой цæхджынтæ. Дыууæ хойы-иу куы фæбыцæу сты, уæд-иу кæстæр хистæрæн загътаид: «цы кæныс, цы, дæ цæхджынтæ дын хæрын». Дыккаг уый æмæ ирон адæм цæхх хастой дардæй, стæм уыд уыцы хæринаг хæрынмæ... Мæнмæ гæсгæ дыууæ фæстаг хъуыдыйы дæр аппаринаг не сты.